January 30, 2023

Noruveje: Interahamwe zikomeje guta ibitabapfu nyuma y’uko umwe muri zo atawe muri yombi

Amakuru yizewe agera kuri MY250TV arahamya ko kuva mu ijoro ryo kuwa 19 Ukwakira 2022, interahamwe n’abajenosideri bamaze igihe bihishahisha mu gihugu cya Noruveje batakibona ibitotsi aho n’imitima yabo itakiri mu bitereko.

Ibyo biri guterwa n’uko aba banyabyaha ruharwa bazi neza ko amazi atakiri ya yandi cyane ko inzego z’ubutera za kiriya gihugu zifatanyije n’iz’u Rwanda ziri kubahigisha uruhindu kugira ngo baryozwe uruhare bagize muri Jenoside yakorewe Abatutsi mu 1994.

Nk’urugero, ku itariki twavuze haruguru Polisi ya Noruveje yataye muri yombi Gasana François (utarahise utangazwa amazina), akaba ari umwe mu nterahamwe wari umaze igihe yidegembya muri kiriya gihugu, uyu ashobora no koherezwa mu Rwanda akaba ari ho aburanishirizwa cyane ko yari yashyiriweho impapuro zimuta muri yombi.

Mu bwoba n’igihuga kinshi abajenosideri bari baragize Noruveje akarima kabo bihutiye gutura intimba imbuga nkoranyambaga aho ubu bari kubogoza ari nako bata ibitabapfu bavuga ko Leta y’u Rwanda “yakoresheje amakosa” iya Noruveje mu ifungwa rya mugenzi wabo.

Gusa nk’abanyabyaha nta kindi kitari ibyo bagomba kuvuga mu rwego rwo kwirengera, ariko baribeshya cyane ko n’ubundi batazahora bihishahisha ubutabera mu gihe icyaha cya Jenoside bakoze kitajya gisaza.

Umuhezanguni Akayezu Muhumuza Valentin wahindutse umumotsi w’izi nyangabirama nyuma y’uko Leta y’u Rwanda imuhaye amahirwe yo kujya kwiga i Burayi, ni umwe mu bari kuvuza induru banakwirakwiza icengezamatwara rigamije gukingira ikibaba aba bicanyi.

Akayezu n’abandi bahuje imyumvire baracurangira abahetsi cyane ko nta na rimwe ikinyoma kigeze cyiganza ukuri; bikwiye gusobanuka ko nta muntu wagize uruhare urwo ari rwo rwose muri Jenoside yakorewe Abatutsi uzacika ubutabera by’iteka.

Ubwanditsi

Leave a Reply

%d bloggers like this: