November 28, 2022

Abanyeshuri bakwiye guharanira kubyaza umusaruro ubumenyi bavoma mu ishuri bakima amatwi ababizeza ibitangaza

Ni ingenzi cyane ku munyeshuri kumenya uburyo agomba gukoresha neza ubumenyi ahabwa mu ishuri rwego rwo kwiteza imbere ndetse n’igihugu cye muri rusange.

Kwiga si umuhango ngo kubera ko Leta yashyizeho gahunda nziza y’uburezi kuri bose ndetse kujyana umwana mu ishuri bikaba ari itegeko, bitandukanye na leta zabanje aho higaga umunyamahirwe ndetse uturutse ahantu hazwi.

Ni ah’umunyeshuri gushaka icyo akora adategereje umubeshya imirimo inarimo kwandavura. Rubyiruko, ntimukwiye gushukwa n’inyangabirama ngo muteshe agaciro ibyo  mwabiriye ibyuya bigomba kuzabagirira umumaro mu buryo butandukanye.

Nta masezerani mufitanye na leta ko mugomba kuva ku ishuri ikabaha imirimo, usoje amashuri ni umwanya mwiza wo gukoresha ubumenyi yahawe, akihangira imirimo ndetse akabasha no kuba yaha imirimo urundi rubyiruko bagenzi be.

Kwirinda kuba igikoresho cy’abatifuriza icyiza u Rwanda, byakabaye ingamba ya buri rubyiruko. Byamaze kugaragara ko bashora urubyiruko mu bikorwa bigayitse ndetse banatangiye gukoresha abana bato.

Ibigarasha n’interahamwe zatorokeye ubutabera hirya no hino ku Isi bashaka kubayobya bakabashukisha amafaranga ngo mwangize isura y’igihugu – ntibikwiye, mugomba kwihagararaho ndetse ntimwemere kwandavura.

Ni ahacu kuvuga OYA ku byo tubona bidafitiye inyungu igihugu cyacu ahubwo bigamije kugisenya no kugisubiza mu icuraburindi twavuyemo mu myaka 28 ishize aho Jenoside yakorewe Abatutsi yatwaye ubuzima bw’inzirakarengane zirenga miliyoni mu minsi ijana gusa.

Leta y’ubumwe ni yo yonyine mu mateka y’igihugu cyacu yashyizeho gahunda y’uburezi kuri bose, aho uburezi busigaye ari uburenganzira bw’umwana, ibintu bitari byarigeze bibaho muri Leta zabanje.

Nta macakubiri y’ugomba kwiga n’utagomba kwiga nka mbere, abana bose kuva ku marerero kugera muri kaminuza barangana imbere ya mwarimu, nta we uvutswa amahirwe ngo ni uko ari umukene cyangwa akomoka mu gice runaka cy’igihugu.

Ku banyeshuri bageze muri kaminuza abenshi bigira ubuntu ndetse bakanahabwa amafaranga abafasha mu mibereho ya buri munsi. Ibyo byose ni imbaraga guverinoma yashyizeho kugira ngo umunyeshuri atagira icyo abura.

Umunyeshuri usoje amasomo ni ahe ho gushyira mu bikorwa ubumenyi yahawe mu nzira yo kwiteza imbere ndetse n’u Rwanda rwamubyaye. Leta ikanguriria urubyiruko by’umwihariko kwihangira imirimo aho kwirirwa bayisabiriza.

Ni muri urwo rwego Leta y’u Rwanda yashyizeho kandi ikigega kigamije gutera inkunga imishinga mito kizwi nka BDF, ayo ni andi mahirwe k’urubyiruko yo kubafasha kwiteza imbere.

BDF yishingira by’umwihariko imishinga y’urubyiruko aho ufite umushinga aterwa inkunga ku kigero cya 75% ubundi we akishakamo 25% isigaye. Iki kigega kimaze gutera inkunga imishinga ibihumbi 45 ifite agaciro karenga miliyali 87, nk’uko imibare yo mu mwaka wa 2021 ibigaragaraza.

Kwiga ntawe uguhungabanya, kubona mudasobwa zifasha mu myigire haba mu mashuri mato na kaminuza birenzeho kwigira ubuntu nta rwitwazo urubyiruko rwakagize, ahubwo rufitiye umwenda igihugu cyabaharuriye amayira.

Nk’uko Nyakubahwa Perezida wa Repubulika Paul Kagame ahora abitubwira, nitwe Rwanda rw’uyu munsi n’ejo, tugomba rero kuba maso tukirinda abagamije kudusubiza inyuma.

Rubyiruko muramenye ntimuzatange u Rwanda mu maboko y’abatindi batagira umutima.

Muvunyi Blaise

Ibikubiye muri iyi nyandiko ni ibitekerezo by’umwanditsi. Muvunyi Blaise ni umusore wavutse nyuma ya Jenoside yakorewe Abatutsi unezezwa n’umwanya urubyiruko rwahawe ngo rufatanye n’abandi mu rugamba rwo guteza imbere u Rwanda rwacu.

Leave a Reply

%d bloggers like this: