December 7, 2022

Interahamwe zikomeje kwerura ko zishyura abantu ngo bavuge ibyo zishaka


Mutimukeye Constance umwe mu bamotsi bakuru b’ingirwashyaka ‘RANP Abaryankuna’ yiganjemo interahamwe zatorokeye ubutabera hirya no hino ku Isi, yatangaje ko Uwimana Nkusi Agnes yari igikoresho cyabo.


Yabitangaje abinyujije mu nyandiko ndende yuzuyemo icengezamatwara ridafite umutwe n’ikibuno yanyujije mu gitangazamakuru rutwitsi cy’iriya ngirwashyaka kuri uyu wa Gatatu tariki ya 2 Ugushyingo 2022.


Ni inyandiko aba bahezanguni biyita ‘abaryankuna’ basohoye shishi itabona nyuma yo kubona ko Uwimana atamaje interahamwe aho yatangaje ko yitandukanyije nazo ndetse ahishura ko hari n’udufaranga zajya zimwohereza ngo akunde avuge ibyo zishaka.


Gukwirakwiza ibihuha nibyo byari byuzuye mu nkuru uyu Mutimukeye yanditse cyane ko yagiye azanamo n’abandi banyabyaha bagiye barenga ku murongo Uwimana yahisemo kutazarenga barimo Aimable Karasira, Christophe Kayumba, Abdul Rachid Hakuzimana, Shikama Jean de Dieu, Ihorahabona Jean de Dieu n’abandi.


Icengezamatwara Mutimukeye yanditse ifite rifite aho rihuriye n’ikiganiro umuhezanguni Ntwali John Williams yatambukije ku muzindaro we wa YouTube; ibintu bishimangira ko izi nterahamwe ubu zifite Ntwali nk’igikoresho cyazo gishya.


Ni mu gihe uyu Ntwali yirirwa kuri YouTube aharabika Leta, agumura abaturage aho aba atangaza icengezamatwara rishyigikiwe n’izi nyangabirama.


Mutimukeye wanditse iriya nyandiko ni n’umurwanashyaka w’agatsiko ka Jambo ASBL kagizwe n’abana b’abajenosideri, ababashyigikiye n’interahamwe nyirizina zirirwa zipfobya Jenoside yakorewe Abatutsi.


Ellen Kampire

Leave a Reply

%d bloggers like this: