November 28, 2022

Ntwali Williams akomeje gushakira amaronko ku muryango wa ‘Cyuma Hassan’

Umuhezanguni Williams Ntwali uhora atangaza ibihuha kugira ngo ashimishe abanzi b’u Rwanda bamukoresh, akomeje guta ibaba ku mbuga nkoranyambaga cyane ko Abanyarwanda bamaze kumenya uwo ari we.

Kuri iyi nshuro, uyu mu ex-FAR wihishe mu itangazamakuru mu rwego rwo guharabika u Rwanda, yongeye gukoresha umuryango wa Niyonsenga Dieudonne ubwi nka Cyuma Hassan mu icengezamatwara rye rigamije guca igikuba.

Ntwali aherutse guhaguruka i Kigali ajya mu Murenge wa Busengo, Akarere ka Gakenke, Intara y’Amajyaruguru ho ku ivuko rya Niyonsenga ajyanwe no gucura inkuru mpimbano ko uyu Niyonsenga ufungiwe muri Gereza ya Mageragere “arimo kugirirwa nabi”.

Muri iyo nkuru ikoze bukinamico, umuhezanguni Ntwali aba ahatira umuryango w’uriya mugororwa ibyo uvuga aho ababyeyi be bumvikana bavuga ko umwana wabo “akubitishwa amashanyarazi”, ibintu ariko uba ubona badahagazeho.

Muri uko gukwibitwa Niyonsenga ngo aba “ahatirwa gusiba YouTube ye” mu gihe n’ubundi imaze umwaka urenga itagaragara; ibintu byatumye benshi bemeza ko ibyo aba babyeyi bavuze batabizi ahubwo ari byo Ntwali yabavugishije ku ngufu ngo akunde yibone inkuru.

Si ubwa mbere Ntwali yihererana umuryango wa Niyonsenga agamije kuwukoresha mu gusiga icyaha u Rwanda n’abayobozi barwo cyane ko iyo umwe mu bagize uyu muryango avuye gusura Niyonsenga uyu muhezanguni ahita amusamira hejuru maze akamuvugisha ibyo ashaka kumva.

Ni mu gihe nyamara uyu muhezanguni ataratera intambwe ngo asure Niyonsenga aho afungiwe kugira ngo abe ari we umwihera inkuru y’imvaho y’uko afashwe muri gereza aho ahubwo ahitamo gukoresha abo mu muryango we gusa nk’aho ayobewe aho afungiwe.

Abakurikira iyi kinamico Ntwali akinana n’umuryango wa Niyonsenga bemeza ko Ntwali bizarangira awugushije mu cyaha, dore ko yaba Papa wa Niyonsenga, nyina cyangwa abavandimwe be ari abantu batakandagiye mu ishuri ndetse bakaba batanasobanukiwe amategeko.

Ntwali utunzwe no gukwiza ibihuha aho yabaye umuyoboro w’interahamwe n’ibigarasha yari aherutse gutangaza indi nkuru mpimbano ko umuhezanguni mugenzi we Nkusi Uwimana Agnes “RIB yamufunze” gusa icyo gihuha cyakubitiwe ahareba inzega nyuma y’uko Uwimana ahamije ko atigeze afungwa ahubwo yari yihaye igihe cyo kwitekerezaho.

Mu gihe Uwimana we yasabye imbabazi k’ubyo yari amaze iminsi atangariza ku muzindaro we, biragaragara ko Ntwali ari we usigaye muri uyu murimo w’ubuhezanguni no gukwiza ibihuha; ibintu  bishobora kuzamuviramo ingaruka mbi cyane ko atari hejuru y’amategeko.

Mugenzi Félix

Leave a Reply

%d bloggers like this: