December 7, 2022

Ipfunwe n’ikimwaro kuri Noble Marara nyuma yo kubona ko ahora acurangira abahetsi!


Umuhezanguni Noble Marara akomeje kugaragaza ko yashegeshwe bikomeye no kubona urubyiruko rw’u Rwanda by’umwihariko abana b’abayobozi bakuru b’igihugu barafashe iya mbere mu kwinjira mu ngabo z’u Rwanda (RDF).


Icyemezo cy’ubutwari cyo kurinda ubusugire bw’u Rwanda uru rubyiruko rwafashe, gitesha agaciro icengezamatwara Marara ahoramo ku mbuga nkoranyambaga agumura urubyiruko aho aba aruhamagarira kuyoboka imitwe y’iterabwoba yiyita ko irwanya u Rwanda.


By’umwihariko uyu Marara ari mu banzi b’u Rwanda bakomeje kuvuga amangambure nyuma y’uko tariki 4 Ugushyingo u Rwanda rwungutse abasirikare 568 bafite ipeti rya ‘Second Lieutenant’ barimo na 2nd Lt. Ian Kagame, umuhungu wa Perezida Paul Kagame.


Nk’urugero, umuhezanguni Marara aherutse kumvikana kuri muzindaro wa YouTube ahuragura amagambo adafite epfo na ruguru mu rwego rwo gukinga ibikarito mu maso abamukurikira buhumyi; ubwo ngo yasobanuraga impamvu 2nd Lt. Ian Kagame yiyemeje kwinjira muri RDF.


Icyo Marara atazi ni uko kuba umwana w’umukuru w’igihugu yarafashe icyemezo cyo kwinjira mu ngabo z’u Rwanda ari ikimenyetso gishimangira gukunda igihugu ndetse ko atewe ishema no kurinda ibyagezweho.


Ku rundi ruhande, icengezamatwara rya Marara kimwe n’abandi bahuriye mu dutsiko tw’abagizi ba nabi biyita ko barwanya u Rwanda ntawe rikwiye kurangaza, cyane ko ibyo ubu bari kuvuga bari kubiterwa n’ipfunwe rikomeye baterwa no kuba urubyiruko rw’u Rwanda rutabitayeho.


Ibyo bishimangirwa no kuba bariya basore n’inkumi barenga 500 baherutse kurahirira kurinda u Rwanda abanzi barwo barimo n’uyu muhezanguni n’abandi bahuje imyumvire.


Uyu muhezanguni ukunze kwigira intiti mu byagisirikare amaze imyaka 24 yihishahisha mu Bwongereza nyuma yo kuhatorokera ubutabera bw’u Rwanda ubwo yari amaze gukora ibyaha binyuranye bifitanye isano n’imyitwarire idahwitse cyane ko yari umusirikare.


Amakuru yizewe agera kuri MY250TV ahamya ko Marara yasaritswe n’ibiyobyabwenge kubera ubuzima butamworoheye abayemo hariya mu Bwongereza aho atunzwe no gukorera isuku abasaza n’abakecuru batagira ubitaho.


Akiri mu Rwanda, Marara yatwaraga imodoka za Minisiteri y’ingabo, nyuma yo gukora biriya byaha yatorokeye muri Uganda aho yari afite umuryango, nyuma abona kujya mu Bwongereza ari naho akibundabunda nka roho mbi.


Marara akwiye kumenya ko mu Rwanda nta muntu witaye ku manjwe ahora akwirakwiza ku mbuga nkoranyambaga agamije kwangisha Abanyarwanda by’umwihariko urubyiruko ubuyobozi buriho.


Mugenzi Félix

Leave a Reply

%d bloggers like this: