December 7, 2022

Nadine Kasinge ashaka gukoresha iturufu y’amoko yigira umunyapolitike, gusa ntibizamuhira!


Nadine Kasinge wiyita “umukandida ku mwanya wa Perezida” akaba by’umwihariko azwiho guhora ku mbuga nkoranyambaga atuka ubuyobozi bw’u Rwanda ndetse anapfobya Jenoside yakorewe abatutsi, yongeye kumvikana aca ibikuba yitwaje umuvuno w’ubwisanzure bwo gutanga ibitekererezo.


Byari mu kiganiro iyi nkotsa imaze imyaka irenga 13 ibuyera muri Canada iherutse kugirana kuri Twitter n’igisambo ruharwana John Simbaburanga wahunze igihugu nyuma yo kunyereza amafaranga yabaga agenewe abapolisi bagenzi be, ubwo yarakiri umupolisi.


Mu buryo bwatumye benshi bamuha inkwenene, uyu Kasinge muri kiriya kiganiro yarifashe asesengura ijambo Perezida wa Repubulika yavugiye mu ihuriro rya 15 ry’ umuryango wa Unity Club aho yahishuye ko nyuma y’ihagarikwa rya Jenoside yakorewe abatutsi mu 1994 bamwe mu bayobozi bashakaga gusubiza igihugu mu bintu bimeze nk’icuraburindi cyari kirimo gusohokamo.


Mu ‘busesenguzi’ bufifitse ndetse budafite umutwe n’ikibuno, Kasinge yumvikana arya indimi avuga ko: “igihugu[u Rwanda] kiri mu bihe bikomeye”, imvugo yari igamije guca igikuba gusa cyane ko atanashoboye gusobanura ayo manjwe yavugaga.


Uyu mugore kandi uhora agambiriye kwigira ‘umunyapolitike’, yumvikanye avuga amagambo aterekeranye aganisha ku mategeko u Rwanda rugenderaho aho by’umwihariko yavuze ko “itegeko nshinga ridasobanutse ku ngingo ya Jenoside”.


Aho nk’uko byumvikana, inkotsa Kasinge yaganishaga ku bukangurambaga yirirwamo bwo kugoreka amateka aho by’umwihariko ari mu batangije igikorwa cy’ubushinyaguzi ngo kigamije “kwibuka jenoside y’abahutu” aho bakoresha ibinyoma by’umuhezanguni w’umuzungu witwa Judi Rever.


Urebye ibyo uyu Kasinge yirirwamo kuri za murandarasi aho abiba inzangano, amacakubiri, gutuka ubuyobozi, gupfobya no guhakana Jenoside yakorewe Abatutsi hanyuma yarangiza akikomanga mu gatuza avuga ko ari ‘umunyapolitike’, bihishura uburyo ashaka kuririra ku ivanguramoko agamije kuyobya Abanyarwanda.


Gusa igitangura benshi ni uburyo uyu mugore yararokotse Jenoside yakorewe Abatutsi mu 1994 aho yamutwaye ababyeyi ndetse na bene nyina bose, gusa kubera umutima w’ubuhezanguni yiyemeje gucira bugufi interahamwe aho afatanya nazo mu icengezamatwara ryibasira RPF/A-Inkotanyi yamurokoye.


Ku rundi ruhande, wakibaza uti: uyu mugore ushaka kuririra ku macakubiri yamugize imfubyi akiri muto akigira umunyapolitike, ni iki kizima yageza ku Banyarwanda n’iyo ngirwa-politike ye?


Igisubizo ni uko nta kintu na kimwe Kasinge yageza ku bantu ndetse na ‘politike’ ashyize imbere Abanyarwanda bamaze kuyitera ishoti; iyo akaba ari impamvu nyamukuru uyu muhezanguni ari gucurangira abahetsi.


RPF/A Inkotanyi imaze kubohora u Rwanda hagashyirwaho Leta y’Ubumwe bw’Abanyarwanda hahise hakurwaho burundu politiki mbi yashingiraga ku moko Kasinge ashaka kugarura.


Iyo politike yasimbuwe na gahunda zigamije kongera kunga abanyarwanda zirimo “Ndi umunyarwanda” ubu ikomeje kwerera imbuto nk’uko bishimangirwa n’ubushakashatsi bunyuranye bugaragaza ko igipimo cy’ubumwe n’ubwiyunge gihagaze neza.


Abantu nka Kasinge nta mwanya bazigera babona muri politike y’uru Rwanda rushya cyane ko Abanyarwanda bazi neza aho amacakubiri n’ivanguramoko byabagejeje mu myaka 28 ishize.


Ibyagezweho byose byagizwemo uruhare n’abanyarwanda bemeye kuba umwe no gusenyera umugozi umwe mu gushakira hamwe ibyagirira igihugu akamaro, rero uwashaka kubisubiza ntibyamworohera.

Rwatubyaye Yvette & Mutijima Vincent

Leave a Reply

%d bloggers like this: