November 28, 2022

Umukobwa wa Mbonyumutwa Dominiko nawe yinjiye mu byo gutagatifuza abajenosideri

Mukamugema Marie Claire, umwe mu bana ba Mbonyumutwa Dominiko, sekuruza w’ingengabitekerezo ya PARMEHUTU yumvikanye avuga ko iyo ngengabitekerezo “itazanye amacakubiri mu Banyarwanda”, imvugo ishimangira ko yiyemeje gutagatifuza bene wabo bamamaje iyi ngengabitekerezo kugeza ivuyemo Jenoside yakorewe Abatutsi.

Mukamugema utamenyerewe ku mbuga nkoranyambaga, ibyo yabivugiye mu kiganiro aherutse guha umuzindaro rutwitsi ubarizwa mu kwaha kw’ingirwashyaka ya FDU-Inkingi ibarizwamo interahamwe n’abajenosideri batorokeye ubutabera i Burayi.

Uyu mukecuru mu mvugo ze zose yakomozaga ku moko, bigaragara ko ariyo yimirije imbere cyane ko mu isoni nke yumvikanye avuga ko kuba Leta y’u Rwanda yarashyize imbere gahunda ya Ndi Umunyarwanda, “ikora ibidakwiye”.

Mukamugema yuririye ku ihuro rya ‘unity club’ riherutse kuba aho Perezida Kagame yahamagariye abayobozi gufasha Abanyarwanda kunga ubumwe, maze ashinja Leta y’u Rwanda ko “yazanye amacakubiri”, icengezamatwara ridashobora kwemerwa cyane ko ahubwo iyi Leta ariyo yimakaje ubumwe n’ubwiyunge.

Uyu mukecuru kandi mu kiganiro cyose byumvikanaga ko nta kindi yavugaho usibye gushimagiza icengezamatwara ryagejeje habi igihugu kigaca mu bihe by’icuraburindi, cyane ko se Mbonyumutwa ari muri bamwe mu bateguye bakanacura imigambi ya Jenoside yakorewe abatutsi bahereye muri 1959 kugeza ubwo bayishyize mu bikorwa muri 1994.

Mukamugema kandi yumvikanye yunga mu rya bishywa n’abisengeneza be babarizwa mu gatsiko ka Jambo ASBL bahora bakingira ikibaba imigambi mibi ya sekuru Mbonyumutwa Dominiko dore ko nabo birirwa batagatifuza ibyaha bye n’ibya se ubabyara Mbonyumutwa Shingiro yapfuye ataryojwe.

Mukamugema ari gucurangira abahetsi, akwiye ahubwo kumenya ko ibinyoma bye bitazakoma mu nkora urugendo rw’ubumwe n’ubwiyunge Abanyarwanda barimo.

Ellen Kampire

Leave a Reply

%d bloggers like this: