February 4, 2023

Abibwira ko bazongera gucamo ibice Abanyarwanda basubize amerwe mu isaho!

Abanzi b’u Rwanda barangajwe imbere n’ibigarasha, interahamwe n’abajenosideri batorokeye ubutabera mu bihugu bitandukanye bakomeje gukoresha imbuga nkoranyambaga bakwirakwiza ibitekerezo bihembera urwango ndetse bicamo ibice Abanyarwanda.

Benshi muri aba banzi b’u Rwanda by’umwihariko ababarizwa mu dutsiko tw’interahamwe n’abajenosideri birirwa bakubita agatoki ku kandi ari nako bikomanga mu gatuza ko bazagaruka mu Rwanda “gusoza akazi” bateshejwe katarangiye.

Ako “kazi” baba bavuga ni Jenoside yakorewe Abatutsi mu 1994 aho bakomwe mu nkokora n’ingabo zari iza RPF/A-Inkotanyi zayihagaritse ndetse zinabohora u Rwanda aho izo nyangabirama zahise zikwira imishwaro mu bihugu bitandukanye mu rwego rwo kwihisha ubutabera.

Intego interahamwe, abajenosideri ndetse n’ibigarasha bahuriyeho ni ukongera kubona u Rwanda mu ishusho nk’iyo mu mwaka wa 1994 aho igihugu cyari cyuzuye imiborogo nk’umusaruro w’amacakubiri yabibwe kuva kera.

Gusa abo bose baribeshya kubera ko Leta y’Ubumwe bw’Abanyarwanda yashyizeho umutamenwa udashobora gutumwa izi nyangabirama zigera ku migambi mibisha yazo; uwo mutamenwa ni gahunda ya ‘Ndi Umunyarwanda’.

Iyo ni gahunda ituma buri munyarwanda yibona nka mugenzi we, bitandukanye na mbere aho bibonaga mu ndorerwamo z’amoko ubu yamaze kuvanwaho burundu muri iki gihugu.

‘Ndi Umunyarwanda’  ni gahunda yatangijwe na guverinoma y’u Rwanda mu mwaka wa 2013 hagamijwe gutoza abanyarwanda kwiyumvamo ubunyarwanda mbere y’ibindi, kubana neza mu mahoro nta rwikekwe no gushyira inyungu rusange z’igihugu imbere kurusha inyungu bwite, binyuze mu rubuga rw’ibiganiro bagirana mu bwisanzure.

Ijanisha ku bumwe n’ubwiyunge mu Rwanda rigaragaza ko Abanyarwanda bafatanyije bakomeje kubaka ubumwe ari nako barushaho guteza imbere igihugu cyabo aho igipimo by’ubumwe n’ubwiyunge mu banyarwanda mu mwaka wa 2021 cyari kuri 94,7% kivuye kuri 92,7% mu 2015 na 82% mu 2010.

Iyo ni intambwe ishimishije ukurikije aho abanyarwanda bari bavuye mu myaka 28 ishize, inzira ndende yo kongera kubaka ubumwe bw’abanyarwanda yahereye ku kubohora igihugu no guhagarika Jenoside yakorewe Abatutsi.

Ni muri urwo rwego ihame ry’ubunyarwanda ryahawe agaciro maze hajyaho Leta y’Ubumwe bw’Abanyarwanda, ibi byari ihame rya RPF-Inkotanyi mu kongera kubaka igihugu cyari cyarashegeshwe n’amateka mabi ku buryo byari bigoye kwemera ko u Rwanda rwakongera kugira aho rwigeza.

Mu mboni ya bariya banzi b’u Rwanda bo bibwira ko ubu bumwe n’ubwiyunge bw’abanyarwanda bwazasubira inyuma hanyuma igihugu kigasubira mu icuraburindi , ibyo babigaragaza mu kwirirwa bakwirakwiza amakuru asebya guverinoma y’u Rwanda ndetse ntibatinya gushimangira ko “nta cyo imariye abanyarwanda”.

Gusa abo bose bashaka gucamo ibice Abanyarwanda ntibizabakundira cyane ko Abanyarwanda twakuye amasomo akomeye mu ngaruka za Jenoside yakorewe Abatutsi kandi na gahunda ya ‘Ndi Umunyarwanda’ ikaba ikomeje gushinga imizi.

Ubumwe bwacu ni zo mbaraga zacu; banyarwanda, banyarwandakazi mureke dukomeze twunge ubumwe twime amatwi ibirura byihishe mu mwambaro w’intama bishaka kuducamo ibice no kutubibamo amacakubiri.

Rwatubyaye Yvette

Ibikubiye muri iyi nyandiko ni ibitekerezo bwite by’umwanditsi. Rwatubyaye Yvette ni umubyeyi w’abana babiri ubarizwa i Kigali, akaba ashishikajwe no kugaragariza amahanga uburyo u Rwanda rukomeje kwiyubaka nyuma yo gushegeshwa na Jenoside yakorewe Abatutsi mu 1994.

Leave a Reply

%d bloggers like this: