December 7, 2022

Umutwe w’iterabwoba wa RNC wongeye kwisama wasandaye!

Abakoresha imbuga nkoranyambaga bakomeje guha urw’amenyo umutwe w’iterabwoba wa RNC nyuma y’uko usohoye amatangazo wiriza amarira y’ingona aho uba ushinja u Rwanda kuba “nyirabayazana” w’ibibazo by’umutekano muke bimaze imyaka irenga 20 mu burasirazuba bwa Congo.

Ni amatangazo yasohotse kuri uyu wa 22 Ugushyingo 2022 maremare yasinyeweho na Mutabazi Etienne, “umuvugizi” wa RNC aho yanditswe mu ndimi z’icyongereza n’igifaransa.

Abambari b’uyu mutwe w’iterabwoba bakaba bakomeje kukwirakwiza ayo matangazo ku mbuga nkoranyambaga aho babimenyesha abayobozi bo mu karere k’ibiyaga bigari bya Afurika ndetse n’abayobozi bo mu burengerazuba b’’Isi.

Muri ayo matangazo yuzuyemo ubujiji n’ubuswa bukabije, RNC izura iberego bidafite epfo na ruguru bimaze igihe bikoreshwa n’abategetsi ba Repubulika iharanira Demokarasi ya Congo, abasesenguzi bakaba basanga uyu mutwe w’iterabwoba ugambiriye kwibagiza Abanyekongo ko wagize inyeshyamba za “P5” zagize uruhare mu kubabuza amahoro igihe kinini.

Mu mwaka wa 2019 n’uwa 2020, Ingabo za Congo (FARDC) zagabye ibitero binyuranye kuri P5 maze ziyica intege nyuma yo kwivugana abarwanyi benshi b’izi nyeshyamba aho bamwe barangajwe imbere na Maj. (rtd) Habib Mudathir boherejwe mu Rwanda baraburanishwa ndetse bahabwa ibihano binyuranye.

Mu isoni nke, abambari ba RNC bashinja u Rwanda guhungabanya umutekano wa Congo; ibintu batanatangira ibimenyetso aho ahubwo birengagiza ko sosiyete sivile ya Congo itahwemye kugaragaza ko “P5” yakoze ibyaha binyuranye byibasiye inyokumuntu muri Kivu y’Amajyepfo birimo ubwicanyi, gufata abana n’abagore ku ngufu, gusahura n’ibindi.

By’umwihariko, mu mwaka wa 2018 akanama k’impuguke z’Umuryango w’Abibumbye (UNGoE) kasohoye raporo igaragaza “P5” ya RNC ari umutwe ugamije guhungabanya umutekano mu karere ndetse n’uw’u Rwanda byumwihariko.

Izi nyeshyamba n’ubwo zaciwe intege n’ibitero bya FARDC hari raporo zigaragaza ko abarwanyi barokotse ibi bitero bagihungabanya umutekano wa Congo by’umwihariko mu bice bya Minembwe; ibintu RNC na Kayumba Nyamwasa, ikihebe kiyiyobora, bakwiye kuryozwa.

Ku rundi ruhande, ntawe bikwiye gutangaza kubona RNC yihandagaza igasohora amatangazo aterekeranye ishinja u Rwanda ibinyoma kubera uyu ari umuvuno abambari mbarwa uyu mutwe w’iterabwoba usigaranye bakoresha berekana ko bakiriho kandi mu by’ukuri bizwi neza ko wacitsemo ibice kubera ubusambo bw’abitwa ko bawuyoboye.

Mugenzi Félix

Leave a Reply

%d bloggers like this: