November 28, 2022

Dr. Théoneste Niyitegeka wahamijwe ibyaha bya Jenoside yiyunze kuri Jambo ASBL mu mukino wo kwigira umwere

Nyuma y’umunsi umwe asoje igifungo cy’imyaka 15 yakatiwe amaze guhamwa n’icyaha cy’ubufatanyacyaha mu bikorwa bya Jenoside yakorewe Abatutsi, Dr. Théoneste Niyitegeka yatangije icengezamatwara ryo gukoresha YouTube agaragaza ko yafunzwe kandi yari “umwere”.

Niyitegeka wiyita “umuharanizi w’uburenganzira bwa muntu” ni umuturage wo mu Ntara y’Amajyepfo, Akarere ka Muhanga, Umurenge wa Cyeza.

Mu mwaka wa 2008 ni bwo inkiko Gacaca z’i Gihuma muri Muhanga zamukatiye kiriya gifungo nyuma yo kumuhamya ibyaha yakoze ubwo yari muganga ubaga abarwayi mu Bitaro bya Kabgayi mu gihe cya Jenoside. Ni igifungo cyashimangiwe n’Urukiko rw’ibanze rwa Nyamabuye muri Muhanga.

Icengezamatwara ryo kwigira umwere hejuru y’ibyaha yahamijwe n’inkiko Niyiteka yatangije, ari kuriterwamo inkunga na Jambo ASBL, agatsiko k’urubyiruko ruba hirya no hino i Burayi rukomoka ku bajenosideri.

Bijya gutangira abahezanguni b’aka gatsiko ka Jambo ASBL birukiye ku mbuga nkoranyambaga bihutira gutangaza inkuru y’ifungurwa rya Niyitegeka maze aba ari nabo batangiza igihuha cy’uko “yafunzwe arengana”.

Niyitegeka nawe yahise ajya kuri YouTube akoraho ikiganiro kidafite epfo na ruguru aho yumvikana asubiramo inshuro zigera muri eshanu ko mu ifungwa rye “yakorewe urugomo” kuko ngo yafunzwe “ku cyaha no ku gihano bidateganyijwe n’amategeko mu Rwanda”.

Igitangaje ni uko uyu mugabo mu kuvuga ko yarenganyijwe yirengagije ko mu miburanire ye yari yemerewe kujuririra mu nkiko zisumbuye ku zamuburanishije; ibyo ari kuvuga bikaba ari igihamya ko n’ubwo yasoje igifungo yakatiwe atiteguye gukosora amakosa ashamikiye ku cyaha yari yarakoze akanabihanirwa.

Niyitegeka akwiye kumenya ko ubutabera bw’u Rwanda butabogama ko kandi igihano cye kuba yaragikoze kikarangira bitamuha ubudahangarwa ku bindi byaha ashaka gukora yitwikiriye umutaka wo kuba “umuharanizi w’uburenganzira bwa muntu” nk’umuvuno mushya asohokanye muri gereza.

Ellen Kampire

Leave a Reply

%d bloggers like this: