November 28, 2022

Ese koko FARDC iritandukanya na FDLR mu minsi itanu nk’uko byanzuriwe i Luanda?

Umutwe w’iterabwoba wa FDLR wahawe iminsi itanu yo kuba washyize intwaro hasi nka bumwe mu buryo bwo kugarura amahoro n’ituze mu burasirazuba bwa Repubulika iharanira Demokarasi ya Congo.

Uwo ni umwe mu myanzuro wafatiwe mu nama yateraniye i Luanda muri Angola kuri uyu wa Gatatu tariki ya 23 Ugushyingo 2022, aho yari igamije kwihutisha ishyirwa mu bikorwa ry’amasezerano agamije gusubiza ibintu mu buryo muri Congo.

Nyuma y’uyu mwanzuro hakomejwe kwibazwa uburyo uzashyirwa mu bikorwa mu gihe ubutegetsi bwa Congo bwanywanye na FDLR aho bwanayinjije mu ngabo z’igihugu (FARDC) nk’uko byahishuwe na raporo zinyuranye.

Ku rundi ruhande, abantu bari kwibaza uburyo FARDC izitandukanya na FDLR mu minsi itanu gusa, cyane ko Perezida Tshisekedi mu ijambo aherutse kugeza mu nama y’inteko rusange y’Umuryango w’Abibumbye yashimangiye ko FDLR itakibaho nka bumwe mu buryo bwo kuyikingira ikibaba.

Leta ya Congo icyo ishyize imbere ni ugukomeza gushinja u Rwanda ibinyoma bidafite ishingiro ko ngo rutera inkunga umutwe wa M23, aho mu mitwe irenga 130 ikorera muri icyo gihugu abategetsi bahitamo kuvuga gusa kuri M23; ibintu bigaragaza ko FDLR n’indi mitwe batabyitayeho.

Umuryango mpuzamahanga ntusiba gusaba Perezida Tshisekedi guca ukubiri na FDLR, gusa uyu mutegetsi akomeje kwinangira; ibintu bihamya ko imyanzuro yafatiwe uyu mutwe w’iterabwoba idashobora gushyira mu bikorwa.

Mugenzi Félix

Leave a Reply

%d bloggers like this: