February 4, 2023

Uburyo amashuri y’imyuga akomeje gutsimbataza iterambere ry’ubukungu bushingiye ku bumenyi mu Rwanda


Imyaka 28 irashize u Rwanda rwibohoye amateka mabi ariko by’umwihariko rwiyubaka mu ngeri zitandukanye mu gusana ibyari byarangijwe na Jenoside yakorewe Abatutsi mu 1994.


Muri iryo terambere ibyakozwe ni byinshi harimo no kongera kuzahura uburezi cyane ko kuva kera kwiga byabaga ari ibibazo bitewe n’uko ubutegetsi bw’igitugu bwaranze u Rwanda muri icyo gihe bwimakazaga ivangura rishingiye ku moko.

Nyuma yo kubohora igihugu, Leta y’Ubumwe irangajwe imbere n’Umuryango RPF-Inkotanyi yifuje ko hashakwa umuti wihuse ku bafite ubushobozi ndetse no kubatabufite cyane ko hari impfubyi ndetse n’abacikirije kwiga bitewe n’amateka mabi iguhugu cyari kivuyemo.


Ni muri urwego hashyizweho amashuri yigisha ubumenyingiro n’imyuga yunganira asanzwe yigisha ubumenyi rusange. Uretse kandi ku basanzwe biga imyuga no ku banyeshuri basoje amashuri y’imyaka 9 na 12 y’uburezi rusange (9&12 Years Basic Education) kwiga imyuga ni kimwe mu mihigo igihugu cyihaye.


Byari bimaze kugaragara ko urubyiruko rwacikirije amashuri bitewe n’impamvu zitandukanye harimo iz’ubukene ndetse n’ubupfubyi wasangaga ruhera mu bwigunge bikabaviramo kujya mu ngeso mbi zirimo gukoresha ibiyobyabwenge, ubusambanyi ndetse n’ubujura.


Mu gushaka umuti w’icyo kibazo Leta y’u Rwanda yashyize imbere amasomo y’imyuga n’ubumenyingiro mu mashuri, hagamijwe gutoza abiga aya masomo umuco wo kwihangira imirimo kugira ngo bace ukubiri n’ubushomeri.


Ibyo kandi byakozwe hagamijwe gufasha urubyiruko kwiteza imbere n’igihugu n’igihugu muri rusange, umuhigo bigaragarira buri wese ko weshejwe bitewe n’ibikorwa by’indashyikirwa bikomeje kugaragazwa n’abiga muri aya mashuri y’ubumenyingiro.


Aha ntitwakwirengagiza kandi ko hari n’abantu bakuru wasangaga batazi gusoma no kwandika ariko bose baritinyutse bariga ubu bicara bafite ubumenyingiro ku buryo hari umusanzu bashobora gutanga no kugira icyo bimarira bakamarira n’imiryango yabo.


Imibare igaragaza ko magingo aya abagana abagana amashuri y’ubumenyingiro ari 39%, aho biteganyije ko muri gahunda ya Guverinoma y’imyaka 7 bazaba bageze kuri 60%.


Intego kandi ni uko mu mwaka wa 2024 ubwo iriya gahunda ya Guverinoma y’imyaka 7 izaba igeze ku musozo buri murenge wo mu Rwanda uzaba ufite byibura ishuri ry’imyuga n’ubumenyi ngiro.


Leta y’u Rwanda kandi yihaye intego y’uko buri mwaka izajya yubaka amashuri y’imyuga n’ubumenyi ngiro 56 ku buryo muri gahunda yo kwihutisha iterambere(NST1) igeza mu mwaka wa 2024 hazaba hari agera kuri 454.


Kugeza ubu umusaruro wa gahunda yo guteza imbere amashuri y’imyuga n’ubumenyi ngiro ugaragarira buri wese aho by’umwihariko urubyiruko rukomeje guhanga udushya turuteza imbere, ibintu byanafashije mu kugabanya umubare w’abanyamahanga bajyaga baza gukora imirimo mu Rwanda yakabaye ikorwa n’Abanyarwanda.


Rwatubyaye Yvette


Ibikubiye muri iyi nyandiko ni ibitekerezo bwite by’umwanditsi. Rwatubyaye Yvette ni umubyeyi w’abana babiri ubarizwa i Kigali, akaba ashishikajwe no kugaragariza amahanga uburyo u Rwanda rukomeje kwiyubaka nyuma yo gushegeshwa na Jenoside yakorewe Abatutsi mu 1994

Leave a Reply

%d bloggers like this: