February 4, 2023

Tshisekedi yeruye umugambi wo gushyigikira FDLR igakuraho ubuyobozi bw’u Rwanda

Perezida wa Repubulika Iharanira Demokarasi ya Congo, Félix Tshisekedi, ubwo yagezaga ijambo ku bahagarariye urubyiruko bagera kuri 250 bo mu ntara 26 za Congo yari yakiriye i Kinshasa, yeruye Impamvu afasha FDLR.

Iyi FDLR ni umutwe w’iterabwoba ugizwe ahanini n’interahamwe zagize uruhare rukomeye muri Jenoside yakorewe Abatutsi mu 1994 zatorokeye ubutabera muri Congo.

Muri iriya mbwirwaruhame gashozantambara, Tshisekedi yashatse impamvu yuririraho zififitse, zirimo guharabika ububozi bw’u Rwanda maze agaragaza ko ubu buyobozi burangajwe imbere na Perezida Kagame “bukwiye kuvanwaho.” Ndetse ko abanyekongo bakwiye gutera ingabo mu bitugu uyu mugambi mubisha.

Iyi mvugo ya Tshisekedi ishimangira ko ashyigikiye FDLR cyane ko ubusanzwe uyu mutwe ari wo umenyereweho kwikomanga mu gatuza ko ushaka kuvanaho ubuyobozi bw’u Rwanda.

Ku rundi ruhande, Tshisekedi avuze ibi mu gihe raporo zitandukanye zidasiba kugaragaza ko afasha umutwe wa FDLR, aho by’mwihariko uhabwa ubufasha bw’ibikoresho by’ intambara byanavuyemo ibitero bitandukanye byagabwe ku butaka bw’ u Rwanda inshuro zirenga eshanu muri uyu mwaka.

Iri jambo kandi Tshisekedi yarivuze agamije kuyobya uburari kuri Jenoside ubutegetsi bwe buri gukorera Abanyekongo bavuga Ikinyarwanda bo mu bwoko bw’Abatutsi; ibintu n’Umuryango w’Abibumbye uherutse gutangaza ko uzi neza.

Ibi kandi byemezwa n’amagambo ya nyirarureshwa Tshisekedi yabwiraga urubyiruko rwari rwitabiriye inama yavugiyemo iriya mbwirwaruhamwe arusaba “kutanga abanyarwanda” nyamara akarenzaho akibasira ubuyobozi bwabo, ibintu asanzwe akora  ndetse bikomeza guhemenbera urwango.

Tshisekedi wanze kwitandukanya na FDLR, none ubu akaba atangiye kujya agaragaza yeruye ko ayishyigikiye, bigaragaza urwango afitiye abanyarwanda, ndetse ko anifuza ko rutakaza ubuyobozi bwiza rwifitiye.

Mu bigaragara, Tshisekedi yifuza ko u Rwanda rubamo akaduruvayo nk’agahora muri Congo aho imitwe y’inyeshyamba irenga 120 yashegeshe icyo gihugu – ibintu ariko Abanyarwanda batazigera bemera ko biba mu gihugu cyabo.

Vincent Mutijima

Leave a Reply

%d bloggers like this: