Ibya Kabuga NTIBIRARANGIRA, Interahamwe mucishe macye!
Ku gicamunsi cyo kuri uyu wa Kane tariki 01 Gicurasi 2025 umujenosideri kabombo Kabuga Félicien aragaruka mu rukiko mu rubanza aburanamo n’umushinjacyaha ku ruhare rudashidikanywaho yagize mu mugambi mubisha wo gutegura no gushyira mu bikorwa Jenoside yakorewe Abatutsi.
Urwego rwasigariyeho Inkiko Mpuzamahanga Mpanabyaha (IRMCT) rubinyujije ku rubuga nkoranyambaga rwa X rwatangaje ko saa kumi z’igicamunsi ku isaha y’i Arusha, mu cyumba cy’iburanisha cy’Ishami rya IRMCT ry’i Lahe ari bwo iki gikorwa kiraba.
IRMCT iti: “…hazaba inama ntegurarubanza mu rubanza umushinjacyaha aburana na Félicien Kabuga. Ibiberamo bizatambutswa hashize iminota 30.”
Ibi bibaye mu gihe Interahamwe zatorokeye ubutabera hirya no hino i Burayi zari zimaze iminsi zisakuza ku mbuga nkoranyambaga ko Kabuga “yamaze gutsinda” kuko “atazaburanishwa”, ku bwabo bakaba biyumvisha ko uyu mujenosideri ari umwere.
Ni mu gihe ku rundi ruhande na Kabuga ubwe kuva yafatirwa mu Bufaransa ku wa 16 Gicurasi 2020 yaranzwe no gutinza urubanza binyuze mu gushaka kwigaragaza nk’umuntu urwaye bikomeye, aya manyanga akaba yarashyizwe ku karubanda na Prof. Harry Gerard Kennedy, umuganga wigenga uzobereye mu kuvura indwara zo mu mutwe.
Muri raporo Prof. Kennedy yashyikirije urukiko muri Werurwe 2013 yavuze ko mu isuzuma ry’ubuzima yakoze yasanze Kabuga afite ibibazo bifitanye isano no kuba ari mu za bukuru aho ngo hari amasaha runaka iburanisha rye rikwiye kujya riberaho.
Umucamanza Bonomy yihutiye kubaza iriya mpuguke niba bidashoboka ko Kabuga ataba ari kwirembya bitandukanye n’uko ubuzima bwe buhagaze maze Prof. Kennedy amusubiza adaciye ku ruhande ko icyo yabonye ari uko Kabuga adashaka ko iburanisha rye rikomeza.
Kabuga ni we muterankunga w’imena wa Jenoside yakorewe Abatutsi kuko mbere y’uko Jenoside itangira yatumije mu mahanga toni nyinshi z’imihoro, ikaba yarakwirakwijwe mu baturage bityo babona intwaro yoroshye yo kwifashisha mu gukora Jenoside.
Amafaranga menshi yari afite, na yo yayifashishije mu gutwara interahamwe aho zajyaga hirya no hino mu bikorwa by’ubwicanyi.
Ubwanditsi
About Author
