Balkanization: Ambasaderi Vincent Karega, yanyomoje abakomeje gukwirakwiza ibihuha ko u Rwanda rushaka kwigarurira ibice bya Congo

Nyuma yaho ibinyoma bivuga ko u Rwanda rushaka kwigarurira ibice bigize Repubulika Iharanira Demokarasi ya Congo mu cyiswe “Balkanization” bikomeje gukwirakwizwa. Ambasaderi w’u Rwanda muri Repulika iharanira Demokarasi ya Congo Vincent Karega, yanyomoje ikwirakwizwa ryaya makuru y’ibinyoma, maze abari inyuma y’ibyo bihuha bararuca bararumira.

Mu kiganiro Ambasaderi Karega, aherutse kugirana n’umunyamakuru wa Jeune Afrique, yabajijwe ibibazo bitandukanye cyane cyane ibigaragara mu mvugo abari inyuma y’ibihuha biri gukwirakwizwa ku mbuga nkoramyambaga, bivuga ko u Rwanda rushaka kwigarurira ibice bigize Repubulika Iharanira Demokarasi ya Congo (BALKANIZATION).
Ikinyamakuru Jeune Afrique cyamubajije niba koko ahakana ubwicanyi bwabereye muri Repulika Iharanira Demokarasi ya Congo mu gace Kasika muri 1998, maze Ambasaderi abasubiza ko atahakanye ubwo bwicanyi, ahubwo ko bwakunze kwitirirwa u Rwanda ko ngo ari rwo rwabukoze mu gihe ako gace kari karimo abasirikare ba Congo (FARDC) ndetse n’abandi basirikare b’ibihugu bitandukanye birimo u Burundi, Angola, Uganda, n’inyeshyamba za Mai-Mai, akibaza impamvu abo basakaza ibihuha bavuga Ingabo z’u Rwanda gusa.

Ambasaderi Vincent Karega

Jeune Afrique yarongeye imubaza ikibazo kijyanye n’ikiganiro umujyanama wa Perezida wa Repulika y’u Rwanda kubijyanye n’Umutekano, Jenerali James Kabarebe yatanze yemeza ko Denis Mukwege n’abandi bari inyuma ya propaganda z’udutsiko turwanya Leta bita “Mapping Report”, Ambasaderi Karega, yasubije ikinyamakuru ko Jenerali Kabarebe yatangaje ubwo butumwa aburira abanyarwanda bo muri Diaspora batuye mu bihugu bitandukanye ku munsi wo Kwibohora ku nshuro ya 26 U Rwanda rumaze rwibohoye ubuyobozi bubi bwayoboye u Rwanda mbere ya Jenoside yakorewe abatutsi muri 1994, abibutsa ko bakwiye kugaruka mu gihugu cyababyaye kandi ko badakwiye kwemera gushukwa n’abababeshya bitwaje Mapping Report uwo Denis Mukwege akoresha kugira ngo abanyarwanda badataha mu gihugu cyabo.

Ambasaderi Karega yongeye kubazwa ikibazo kigira kiti “Ese U Rwanda rwaba ruzi ko bamwe mu banyapolitiki cyangwa aba Sosiyete Sivile bo muri Repubulika Iharanira Demokarasi ya Congo bagerageza kwica umubano uri hagati ya Perezida Félix Tshisekedi na Perezida Paul Kagame?” Ambasaderi Karega yahise asubiza umunyamakuru ko hari ibihamya byinshi bibyemeza cyane ko Perezida Félix Tshisekedi acibwa integer, kubera ko agaragaza kwitanga mu bikorwa bye bya Dipolomasi aho afatanya n’ibihugu by’ibituranyi kandi abantu bamwe ntibabikunda cyane cyane mwene nkabo navuze haruguru batifuriza amahoro U Rwanda.

Jeune Afrique yongeye kubaa Ambasaderi Karega ikibazo kijyanye n’uko nyuma y’imyaka 20 U Rwanda rugaruka kenshi mu bikunze kuvugwa ku ruhare rwagize mu Burasirazuba bwa Congo, cyigira cyiti :“ Ese yaba ari iyihe mpamvu u Rwanda rwafashe umwanzuro wo kohereza ingabo zarwo mu gihugu cya Repubulika Iharanira Demokarasi ya Congo?” Ambasaderi Karega yahise asubiza ko U Rwanda rutagiye kwigarurira ibice bya Congo (Balkanization), nkuko byitwa cyangwa se gutwara amabuye y’agaciro Coltan) ahubwo ko rwagiye yo kurwana n’umutwe w’iterabwoba witwaje intwaro wa FDLR, ugizwe n’Interahamwe zasize zikoze Jenoside muri 1994 warumaze kuhashinga ibirindiro mu mugambi wo kugaruka mu Rwanda gukomeza ubwicanyi , iyo ntambara yahuriranye n’ihirikwa ry’ubutegetsi bwa Marshal Mobutu ariko ibyo byakozwe n’abakongomani.

Ikiganiro kiri hafi kugera ku musozo Amabasaderi Karega yabajijwe n’ikinyamakuru Jeune Afrique uburyo amahoro yagaruka mu Uburasirazuba bwa Repubulika Iharanira Demokarasi ya Congo, maze abasubiza ko icyo kibazo gikwiye kubazwa ubuyobozi bw’igihugu cya Congo bwita ku gihugu n’abaturage bacyo, yakomeje avuga ko u Rwanda ntacyo ruburana, yewe nta na pariseri y’ubutaka bwa Congo ifite, nubwo u Rwanda rukomeza kubeshyerwa gutwara ibice bya Congo, yakomeje ashimangira ko ibyo bihuha biba biharabika u Rwanda kandi ko rutewe ishema n’uko rungana n’imipaka yarwo.

Jeune Afrique yasoje ikiganiro yagiranye na Ambasaderi Karega imubaza ikibazo cyanyuma kigira cyiti, “Ese ni gute habaho amahoro arambye mu gihe U Rwanda rutemera gusangira inshingano n’abandi?” Amabasaderi yasubije agira ati, “Ese ni nde ujya uvuga ibyaha byakorewe ikiremwamuntu mu 1994 mu Rwanda? n’abantu bavuye muri Congo kubera ko Repubulika Iharanira Demokarasi ya Congo ari indiri y’abajenosideri?” asoza agira ati:” Uyu munsi turi kugerageza gushakira igisubizo turwanya buri wese ushaka guhungabanya Umutekano w’ibihugu bigize ibiyaga bigari.

Tubibutse ko abakunze kugaragara inyuma y’ibihuha byuko u Rwanda rushaka kwigarurira ibice bya Repubulika iharanira Demokarsi ya Congo (Balkanization) ari abarwanya Ubuyobozi bw’igihugu cya Congo, bagizwe n’abatavuga rumwe n’ishyaka riri ku butegetsi, bibumbiye mu mpuzamashyaka ya LAMUKA igizwe n’amashyaka nka UNC rya Vital Kamerhe, CONGO NAS BISO/SYENCO) riyobowe na Freddy Matungulu Mbuyamu, Nouvel Elan riyobowe na Adolphe Muzito, Ensemble pour la République riyobowe na Moïse Katumba, MLC riyobowe Jean Pierre Bemba ndetse na ECiDé riyobowe Martin Fayulu. Uretse amashyaka abiri muri aya, irya Jean Pierre Bemba ndetse nirya Moïse Katumba, niyo yonyine yitandukanije n’imvugo ya Adolphe Muzito wakunze kugaragara cyane muri iyo Propaganda yiswe “Balkanization”.

Umwanditsi: Ellen Kampire

Siga igitekerezo

This site uses Akismet to reduce spam. Learn how your comment data is processed.

%d bloggers like this: