January 30, 2023

Perezida Ruto yunze mu rya Kagame ko “kwitana ba mwana” bitakemura ibibazo by’umutekano muri Congo

Perezida  Kagame aherutse kuvuga ko gukomeza kwitana ba mwana bitakemura ikibazo muzi cy’umutekano muke muri cya Repubulika ya Demukarasi ya Congo, ahubwo hakenewe ubushake bwa politiki.

Ibyo umukuru w’igihugu yabivugiye i New York muri Leta zunze Ubumwe za Amerika mu bwirwaruhamwe yagejeje ku bitabiriye inama y’Inteko rusange y’Umuryango w’Abibumbye.

Yagize ati: “…hakenewe mu maguru mashya ubushake bwa politiki bwo gukemura ibibazo by’umutekano muke mu burasirazuba bwa Congo, uhereye mu mizi. Kwitana ba mwana gusa ntibikemura ibibazo.”

Nyuma y’iminsi itatu Perezida Kagame avuze iryo jambo, mugenzi we wa Kenya Dr. William Ruto aganira na Televiziyo ya Al Jazeera na we yashimangiye ibirikubiyemo ashimangira ko Kinshasa ikwiye kwita “ku gucyemura ibibazo bihari” aho “kwitana ba mwana no gutungana inkoti”.

Mu gukemura ibibazo by’umutekano byabaye akarande muri Congo, abategetsi b’iki gihugu ntibasiba kugirwa inama yo kubahiriza imyanzuro iri mu masezerano yasinyiwe i Luanda muri Angola ndetse n’imyanzuro y’andi masezerano yasinyiwe i Nairobi muri Kenya aho Congo iba isabwa kuganira n’umutwe wa M23 cyane ko ari uw’Abanyekongo.

Ikindi kibazo Tshisekedi na Leta ye basabwa gukemura ni uguhagarika imvugo z’u rwango zibasira Abanyekongo bo mu bwoko bw’Abatutsi no kwitandukanya n’umutwe w’iterabwoba wa FDLR mu gihe nyamara bo bakomeza kuwukingira ikibaba bavuga ko “utakiriho”.

Ni mu gihe iyi FDLR idasiba kugaragara mu bikorwa by’iterabwoba muri Congo no mu Rwanda aho by’umwihariko iherutse kurasa ibisasu byangije byinshi ndetse bikomeretsa abaturage b’inzirakarengane.

Igihe kirageze ngo Tshisekedi yumve ko igisubizo cy’ibibazo byugarije igihugu cye kiri mu biganza bye nk’uko adasiba kubibwirwa.

Umwanditsi

Leave a Reply

%d bloggers like this: