November 28, 2022

Musana Jean Luc yongeye gushimangira ko ari inyigaguhuma irandatwa na Ingabire Victoire muri “politike” y’amafuti

Musana Jean Luc, umuhungu w’imyaka 31 wiyita umunyapolitike aho akorera mu kwaha kw’umuhezanguni Ingabire Victoire, yagaragaye ku mbuga nkoranyambaga yinyuraguramo mu mvugo ari nako yibasira ibiro (bureau/office) by’Umukuru w’Igihugu.

Byari mu kiganiro aherutse gukorera ku muzindaro we wa YouTube aho yaganiraga n’uwitwa Uwimbabazi Eric, umugabo basanzwe babana no mu ngirwa-shyaka ikorera mu cyuka aho badasiba kuryitwaza bayobya Abanyarwanda banabangisha ubuyobozi bwabo.

Musana ni indashima cyane ko aho ageze uyu munsi abikesha Leta y’u Rwanda yamwitayeho kuva mu bwana bwe binyuze mu kigega cyita ku barokotse Jenoside yakorewe Abatutsi batishoboye (FARG).

Yahisemo ahubwo kwihenura, gusuzugura, kutumva, gutukana no gupfobya gahunda zose za Leta y’u Rwanda agaragaza ko “nta cyo zimaze” aho akunda kumvikana avuga ko abayobozi nta cyo bakora bityo “bakwiye kwegura”.

Muri kiriya kiganiro Musana yumvikanye yikomanaga mu gatuza ko “ari inshingano” ze kunenga ukuntu Perezidansi “ikora nabi kuko itakira abanyarwanda” aho ngo “yakira abanyamahanga gusa”.

Musana yahuraguye ayo magambo yirengagije ko nta munyarwanda ujya usibizwa inyuma ku biro by’umukuru w’igihugu aho ahubwo abaturage bahahora bamwe baje kumushimira ku bw’iterambere yabagejejeho mu gihe abandi baba baza kumugezaho ibibazo bakeneyeho inyunganizi ze.

Mu bujiji asanganwe, Musana muri kirya kiganiro kandi yarihandagaje avuga ko “Perezidansi ifunze nta gihombo cyabaho” ndetse n’andi magambo atameshe agaragaza ko uyu wiyita “umunyapolitike” atazi imikorere, umumaro n’ububasha bw’Umukuru w’Igihugu n’ibiro bye.

Kuba Musana ahangara kwibasira ibiro by’umukuru w’igihugu nta kintu gifatika ashingiye ntawe bikwiye gutungura cyane ko uyu muhungu yamaze kunywana n’umuhezanguni Ingabire Victoire mu gukwirakwiza icengezamatwara rigamije guharabika ubuyobozi bw’u Rwanda na guca ibikuba mu baturage.

N’Ibyo Musana ntazatinda kubona ko yahisemo nabi kandi ari kwishora mu rwobo atazigera yivanamo, agomba kandi kuzirikana ko hari umurongo ntarengwa!

Mukobwajana Linda

Leave a Reply

%d bloggers like this: