January 30, 2023

Ingabire Victoire akomeje kwiruka inyuma y’ibyamusize

Ingabire Victoire, umuhezanguni akaba n’ikirura kihishe mu mwambaro w’intama, akomeje kwigira “umunyapolitike” ufitiye impuhwe Abanyarwanda; ibintu ariko bitazamuhira cyane ko Abanyarwanda bamaze kumenya wo ari we.

Ni mu gihe uyu mugore umaze imyaka ine asohotse muri gereza nyuma yo gutakamba asaba imbabazi ndetse akazihabwa n’umukuru w’igihugu. Gupfobya Jenoside yakorewe Abatutsi no kugambirira kugirira nabi ubuyobozi bw’u Rwanda ni bimwe mu byaha yari yafungiwe.

Nyuma yo gufungurwa, Ingabire yashoye imari mu itangazamakuru rica igikuba nk’intwaro akoresha ngo yigarurire Abanyarwanda, gusa icyo atazi ni uko nta we umwitayeho mu bo ahora agambiriye guha uburozi bwe.

Nk’urugero, ku mugoroba wo ku wa 28 Nzeri 2022, Ingabire yagaragaye ku cyitwa ‘Imbarutso ya Demokarasi’, umwe mu mizindaro rutwitsi ya YouTube yashinze ngo imufashe gukwirakwiza icengezamatwara rye k’u Rwanda, mu kiganiro kitari gifite epfo na ruguru aho ngo yavugaga “ku bibazo byugarije Abanyarwanda.”

Icyagaragaye ahubwo iyi nkunguzi y’umugore yivugiraga ibibazo biyugarije yo ubwayo; nk’urugero Ingabire yongeye kwibasira Guverinoma y’u Rwanda ku mwanzuro iherutse gufata wo kwimura abahoze batuye mu manegeka y’Imidugudu ya Kangondo na Kibiraro aho aba baturage bishimira inzu zijyanye n’igihe bahawe mu Mudugudu w’Ikitegerezo wa Busanza.

Ni mu gihe Ingabire we ubwe afatanyije n’abandi banzi b’u Rwanda bagerageje gukoresha Kangondo na Kibiraro mu ngirwa-politike bitwa ko bakora, aho bagiye mu matwi abaturage barabagumura yewe banashaka kubashora mu myigaragambyo ariko n’ubundi birangira bakamye ikimasa.

Igisekeje ni uburyo Ingabire yabuze icyo abeshya Abanyarwanda ahitamo gusubira mu binyoma bimaze iminsi bicuruzwa n’umumotsi w’umutwe w’iterabwoba wa RNC, David Himbara Muruganwa, byubakiye ku kugoreka ibiherutse gutangazwa na Banki y’Isi ku iterambere ry’u Rwanda.

Muri ibyo bihuha biba gusa mu mutwe wa Ingabire na Himbara harimo ko ngo “u Rwanda rukennye cyane”, aho birengagiza ko Banki y’Isi idahwema kugaragaza ko u Rwanda ruri mu bihugu bya mbere bifite umuvuduko w’ubukungu ku Isi. Nk’urugero raporo y’iyi banki yasohotse muri uku kwezi ihishura ko ubukungu bw’u Rwanda bwazamutseho 7.9%.

Umusesenguzi waganiriye na MY250TV yagize ati: “Mu by’ukuri Ingabire ibyo yita ibibazo, si ibibazo, yewe nta n’ibisubizo yerekana cyangwa ngo afatanye n’abanyarwanda gutanga umusanzu.”

Uyu musesenguzi yakomeje avuga ko nta muntu ukwiye ukwiye kwita ku byo Ingabire yirirwamo cyane ko nta neza yifuriza u Rwanda n’Abanyarwanda.

Atanga urugero rw’uburyo uyu Ingabire aherutse gutangaza ko yiteguye gutegura indi Jenoside igihe Leta y’u Rwanda yaba ikomeje kwanga kuganira n’imitwe y’iterabwoba yiyita ko iyirwanya harimo n’uwa FDU-Inkingi abereye umuyobozi.

Ellen Kampire

Leave a Reply

%d bloggers like this: