November 28, 2022

Twagiramungu “Rukokoma” yongeye gushimangira ko ashaka guhambanwa ingengabitekerezo ya Jenoside

Ku myaka 77 y’amavuko, Twagiramungu Faustin wiyita Rukokoma, akomeje kugaragaza ko adateze kwitandukanya n’ingengabitekerezo ya Jenoside yamwokamye kabone n’ubwo ari mu minsi ye ya nyuma cyane ko muri iyi minsi ahanganye n’ibirwara byo mu zabukuru.

Nk’urugero, Twagiramungu ushaje yanduranya aherutse kumvikana kuri umwe mu mizindaro rutwitsi ya YouTube ibarizwa mu kwaha kw’interahamwe n’abajenosideri batorokeye ubutabera i Burayi atagatifuza uruhererekane rw’ubutegetsi bw’igitugu bwateguye ndetse bushyira mu bikorwa umugambi wa Jenoside yakorewe Abatutsi.

Mu isoni nke asanganwe, uyu muhezanguni yumvikanye agerageza kugoreka amateka y’u Rwanda aho by’umwihariko yihandagaje akabeshya abakurikira buhumyi ko Jenoside yakorewe Abatutsi “ntiyatangijwe na politike y’abahutu mu 1957”.

Aha umuntu akaba atabura kubaza uyu musaza ushaka gusiga inkuru mbi imusozi  icyatumye umubare munini w’Abatutsi umeneshwa mu Rwanda guhera mu mwaka wa 1959.

Ni mu gihe mu myaka yakurikiyeho umunyagitugu Habyarimana wategekaga u Rwanda  atasibye kuvuga ko abari barameneshejwe badashobora kugaruka mu Rwanda kuko ngo rwari rumeze “nk’ikirahure cyuzuye amazi” bityo ko bagarutse ayo mazi “yameneka”.

Twagiramungu wari ushagawe n’interahamwe kabombo zirimo Jean Marie Vianney Ndagijimana na Benzinge Boniface muri kiriya kiganiro, yumvikanye kandi yikomanga mu gatuza avuga ko “u Rwanda rukwiye kwemera akababaro abahutu bagize” kandi ko “abahutu barenganye bakwiye kurenganurwa.”

Izo mvugo zigaragaza ko Twagiramungu atazi ko Abanyarwanda bamaze kuba umwe aho barenze ivanguramoko nk’umusaruro wa gahunda ya ‘Ndi Umunyarwanda’ ikomeje gutuma babana mu mahoro ntawishisha mugenzi we.

Abanyarwanda bahisemo gutahiriza umugozi umwe mu rwego rwo gukumira icyabasubiza mu mateka ashariye banyuzemo, rero Twagiramungu n’abandi bahuje ubuhezanguni baravomera mu rutete.

 Mukobwajana Linda

Leave a Reply

%d bloggers like this: