December 7, 2022

“Opozisiyo” kuri Ingabire Victoire ni imitwe y’iterabwoba abarizwamo!


Umuhezanguni Ingabire Victoire Umuhoza (IVU) yumvikanye arya indimi asobanura ko ngo mu Rwanda nta mashyaka atavuga rumwe n’ubuyobozi burangajwe imbere n’Umuryango RPF-Inkotanyi ahari.


Byari mu kiganiro aherutse gukorera kuri umwe mu mizindaro ya YouTube yashinze ngo imufashe gukwirakwiza icengezamatwara rye.


Uwo muzindaro ukoreshwa na Musana Jean Luc n’uwitwa Uwimbabazi Eric; insoresore uyu muhezanguni yogeje mu bwonko aho zisigaye ziyumva nk’ibitangaza mu ngirwapolitike zivuga ko zikorera kuri murandasi.


Mu rugo rwa Ingabire, ahabereye iki kiganiro, hari n’umuhezanguni Bicahaga Abdallah nk’uko bigaragazwa n’amafoto Musana yashyize ku mbuga nkoranyambaga; iyi akaba ari indi gihamya y’uko aba batatu bakorana bya hafi mu migambi mibisha yabo yo gutanya Abanyarwanda no kubacamo ibikuba.


Muri iki kiganiro Ingabire yongera gushimangira ko ari umuhezanguni utifuriza ineza Abanyarwanda aho atesha agaciro ibyo u Rwanda rumaze kugeraho mu rugendo rwo guteza imbere politike idaheza.

Mu isoni nke, uyu muhezanguni yavuze ko “opozisiyo idahabwa agaciro” ndetse ko we ubwe afite ingirwashyaka ya DALFA-Umurinzi ikora nubwo ngo idahabwa umwanya nk’uko bikwiye ngo itange ibitekerezo ku bibazo.


Iyi nkunguzi y’umugore kuvuga ko mu Rwanda “nta opoziyo” ihari ni agasuzuguro no gutesha agaciro ibikorwa by’amashyaka arimo PS Imberakuri ya Christine Mukabunani na DGPR ya Frank Habineza.


Ingabire yirengagiza kandi ko hari n’amashyaka atanga abakandida bahangana n’uwa RPF-Inkotanyi arimo nka PPC yatanzeho umukandida Dr. Mukabaramba Alvera ku mwanya wa Perezida wa Repubulika mu mwaka wa 2010, muri ayo matora kandi ishyaka rya PL ryatanzeho umukandida Prosper Higiro mu gihe ishyaka rya PSD ryo ryari rifite Dr. Jean Damascene Ntawukuriryayo nk’umukandida.


Umuhezanguni Ingabire yakomeje agaragaza ko imitwe y’iterabwoba yandagaye hirya no hino ku Isi aho yiyita ko irwanya Leta y’u Rwanda ari yo yemera nka “opozisiyo” ni mu gihe iyi mitwe irangajwe imbere na FDLR ihora igambiriye kugirira nabi Abanyarwanda.


Ni mu gihe ku rundi ruhande, Ingabire yabaye umuyobozi muri FDLR mbere y’uko aza mu Rwanda mu mwaka wa 2010, aho n’ubundi yakomeje imikoranire n’uyu mutwe ugizwe ahanini n’interahamwe zagize uruhare muri Jenoside yakorewe Abatutsi mu 1994 nyuma yo kugera mu Rwanda.


Mu gushimangira isano muzi afitanye na FDLR, Ingabire muri kiriya kiganiro yahamije ko u Rwanda rukwiye kugirana ibiganiro n’uyu mutwe w’iterabwoba; ibintu ahuza no kuba afata uyu mutwe nka “opozisiyo”.


Ingabire ameze nka wa mushonji urota arya; ibyifuzo by’ubugome afitiye u Rwanda n’abanyarwanda ntibizigera bimuhira cyane ko Abanyarwanda bavanye amasamo akomeye muri politike y’ivangura ashaka ko igaruka mu Rwanda.


Ellen Kampire

Leave a Reply

%d bloggers like this: