FC Barcelona yegukanye igikombe cya 27 cya Shampiyona ya Espagne
Fc Barcelona yegukanye igikombe cya shampiyona ku nshuro ya 27 nyuma yo kunyangira ikipe ya Espanyol Barcelona basangiye umujyi ibitego 4–2. Ikipe ya Barcelona yaherukuga gutwara igikombe cya shampiyona muri 2019, ubu yari imaze imyaka itatu yose idatwara igikombe.
Ikipe ya Barcelona yabonye ibitego bitatu byose mu gice cya mbere.
Ibitego byatsinzwe na Robert Lewandowski watsinzemo ibitego bibiri ku munota wa 11 na 40, ikindi gitsindwa na Alejandro Balde ku munota wa 20. Igitego cya kane cya Barcelona kinjiyemo mu gice cya kabiri gitsinzwe na myungariro Jules Koundé ku munota wa 53. Espanyol Barcelona yo yatsindiwe na Sergi Darder ku munota wa 73 ndetse na Joselu ku munota wa 90.
Umutoza wa Barcelona Hernández Xavi wegukanye ibikombe umunani bya La Liga mu gihe cy’imyaka 17 yakiniye mu ikipe ya Barcelona, abonye shampiyona ye ya mbere ari umutoza wayo.
Iyi ntsinzi yatumye FC Barcelona igira amanota 85, irusha Real Madrid iri ku mwanya wa kabiri amanota 14 yose mu gihe hasigaye imikino ine gusa kugirango shampiyona ya Espagne ishirweho akadomo.
Karemera Jean Luc
About Author
