Mbonyomutwa wa Jambo ASBL yuririye ku rubanza rwa Charles Onana apfobya Jenoside yakorewe Abatutsi, ashimangira ubuhezanguni bwamwokamye!
Mbonyumutwa Gustave, umwe mu nkingi za mwamba za Jambo ASBL – agatsiko k’abahezanguni b’abana baba i Burayi biyemeje gutagatifuza ba se na ba nyina b’abajenosideri, yakoresheje urubanza rw’umuhezanguni Charles Onana mu guhakana no gupfobya Jenoside yakorewe Abatutsi; ibintu nawe akwiye kuryozwa.
Ibi Mbonyumutwa wigeze kuyobora Jambo akaba by’umwihariko mu byumweru bibiri bishize yari akuriye igihiriri cy’interahamwe zagaragaye mu rubanza rwa Onana i Paris mu Bufaransa, yabigaragarije mu nyandiko ndende yatambukije ku rubuga rwa murandasi rusanzwe zukoreshwa mu gucengeza amatwara y’aka gatsiko k’abarozi mu bijyanye n’amacakubiri n’ivangura rishingiye ku moko.
Uyu muhungu wonkejwe amashereka y’urwango icyo yari agamije muri iriya nyandiko ni ugutiza umurindi imwe mu mirongo ikubiyemo uburozi bukomeye yakuye mu bitabo by’umuhezanguni Onana bihakana bikanapfobya Jenoside yakorewe Abatutsi – ibi bikaba biri mu byo yaburaniye mu Bufaransa.
Mu kugenda aca akarongo kuri izo nyandiko za Onana, Mbonyumutwa wiyemeje kugomera u Rwanda, yageragezaga kwerekana ko ibyo onana yanditse “bifite ishingiro” mu gihe nyamara ari ibinyoma bigamije by’umwihariko gutoneka inkovu z’abarokotse Jenoside yakorewe Abatutsi no gusiga icyasha ingabo zari iza RPA/F-Inkotanyi zahagaritse iyi Jenoside.
Nk’urugero, hari aho umuhezanguni Mbonyumutwa avuga ko icyo yita “jenoside yakorewe abahutu n’abatwa” kitabazwa FPR kandi “ari yo yayikoze”, akongera akuririra ku binyoma bya Onana aho avuga ko urukiko mpuzamahanga mpanabyaha rwari rwarashyiriweho u Rwanda i Arusha, “rwananiwe kwerekana ko mu Rwanda habayeho Jenoside yakorewe Abatutsi”.
Mbonyumutwa na bagenzi be ba Jambo ASBL kimwe n’izindi nterahamwe zose bafite ubwoba kandi ni mu gihe kuko iyo urebye uburyo Inkiko z’u Bufaransa ziherutse gukatira igifungo cy’imyaka 27 umujenosideri Rwamucyo Eugene, birerekana ko ntakabuza na Onana azaryozwa ibyaha yakoze.
Kwitwara nk’interahamwe…
Umuhezanguni Mbonyumutwa mu gihe cy’urubanza rwa Onana yari ayoboye itsinda rinini ryaje kumushyigikira aho by’umwihariko bagaragaye mu bikote bisa nk’ibyo interahamwe zambaraga ubwo zajyaga kwica Abatutsi mu gihe cya Jenoside.
Soma kandi: Interahamwe n’abajenosideri bashyushye mu mitwe kubera urubanza rw’umwambari wabo Onana
Mbonyumutwa na bagenzi be nta n’umwe wigeze ufata iya mbere ngo ashinjure Onana mu rukiko, ariko biratangaje kubona nyuma y’iminsi micye ibura ngo hafatwe icyemezo aribwo yibutse kwandika inyandiko imushinjura ndetse imutagatifuza.
Gupfobya no guhakana Jenoside yakorewe Abatutsi ni imwe mu mpamvu nyamukuru yatumye Jambo ASBL ishingwa, ndetse magingo aya ikaba ishyigikiwe cyane na Leta y’u Bubiligi cyane ko iyitera inkunga, ibi bitera akanyabugabo abambari b’aka gatsiko bigatuma bahora ku mbuga nkoranyambaga bahakana ari na ko bapfobya Jenoside yakorewe Abatutsi.
Mbonyumutwa na bagenzi be ba Jambo ASBL bakwiye kumenya ko ubutabera bw’u Bufaransa butazafata icyemezo bushingiye ku nyandiko zabo zipfobya zikanahakana jenoside yakorewe abatutsi, ahubwo buzagendera ku kuri guhari cyane ko no mu kwiregura Onana yagaragaje intege nke ndetse na bamwe mu bamushinjuraga bamutaba mu nama.
Uko biri kose Onana azaryozwa ibyo yakoze, ndetse mu gihe gikwiye aba bambari ba Jambo ASBL na bo bazaryozwa ibyaha by’amacukubiri, guhakana no gupfobya Jenoside yakorewe Abatutsi n’ibindi badasiba kwivurugutamo.
Mugenzi Félix
About Author
