Madamu Jeannette Kagame yafunguye ‘Imbuto Hub’ mu Bugesera
Kuri uyu wa Gatanu tariki ya 24 Nyakanga 2026, Madamu Jeannette Kagame, yatangije ku mugaragaro mu karere ka Bugesera Imbuto Hub, igikorwa remezo kigenewe gutanga amahugurwa y’imyuga, guteza imbere siporo, uburezi, kwita ku bana bato ndetse na serivisi z’ubujyanama ku buzima n’imibereho myiza.
Iki gikorwa remezo cyubatswe ku bufatanye bw’Akarere ka Bugesera n’Umuryango Imbuto Foundation, aho kigamije guteza imbere urubyiruko no gufasha abaturage b’ako karere muri rusange.
Imbuto Hub ni uburyo bushya bwo kwegera imiryango, hagashyirwaho ahantu hashobora kuboneka serivisi zirimo izigenewe abana bato baba bari kumwe n’ababyeyi babo cyangwa bari bonyine.
By’umwihariko, Imbuto Hub y’i Bugesera yashyizwemo ibibuga byifashishwa muri siporo, ahantu h’imyidagaduro, aho kunguranira ibitekerezo, isomero n’ibindi.
Muri uyu muhango Madamu Jeannette, yashimye abagize uruhare muri uyu mushinga, ashimangira ko ari umusanzu ukomeye mu kubaka u Rwanda.
Ati: “Iyi hub muyibonemo imbaraga zanyu, ubumuntu bwanyu n’ubwitange bwanyu. Iyo tureba inyubako, izi gahunda n’ibi byishimo biri mu maso y’abana n’urubyiruko tubona umusaruro w’ubufatanye bwanyu. Ibyo mukora ntibizapfa ubusa, mubiba imbuto zizakomeza kwera mu gihugu cyacu imyaka myinshi.”
Yakomeje avuga ko ari ibyishimo kuba iki kigo gitashywe mu kwezi Abanyarwanda bizihizamo ukwibohora kw’igihugu cyabo.
Ati: “Ni ibyishimo kuri twe kuba ibi birori bibaye muri uku kwezi twizihizamo Kwibohora, Kwibohora si umunsi umwe gusa, ni urugendo rwa buri wese, rwa buri munsi, rwo kubaka umuturage ushoboye, wigirira icyizere kandi ufite uruhare mu iterambere ry’umuryango we n’igihugu.”
Yakomeje agaragaza ko biteze ko Imbuto Hub izaba amahirwe yo guteza imbere impano z’urubyiruko ndetse n’ibindi bikorwa bifasha mu mibereho myiza y’umuryango.
At: “Uyu munsi ntabwo turi hano gutaha inyubako gusa, turi hano kubiba indi mbuto, imbuto y’icyiciro gishya, icyiciro cy’amahirwe kizafasha kwegera abaturage kurushaho, impano z’urubyiruko zigahabwa urubuga n’umuryango nyarwanda ugakomeza kuba umuryango utekanye kandi ushoboye.”
Soma kandi: Ubuhamya bw’abafite abana batewe inda imburagihe bahinduka ba gicibwa, ‘Imbuto Foundation’ ibasubiza agaciro
Kuva gahunda ya Imbuto Hub yatangira mu mezi atatu ashize, yakira nibura urubyiruko 200 ku munsi. Muri icyo gihe, abantu barenga 960 bamaze gukoresha isomero, 875 bahawe serivisi z’ubujyanama ku buzima n’imibereho myiza, 117 bakora imyitozo ngororamubiri ku buryo buhoraho, mu gihe abana 1,402 bamaze gukoresha irerero ry’abana.
Ubwanditsi
About Author
