December 7, 2022

Miliyari zirenga ebyiri z’amafaranga y’u Rwanda zimaze guhabwa abahoze muri Kangondo nk’ingurane

Guverinoma y’u Rwanda yatangaje ko imaze gutanga miliyari zirengaho gato ebyiri z’amafaranga y’u Rwanda nk’ingurane ku baturage bahoze batuye mu gice cy’amanegeka yo mu Midugudu ya Kangondo na Kibiraro ho mu Murenge wa Remera, Akarere ka Gasabo.

Ni amafaranga yahawe imiryango yari ifite imitungo irengeje agaciro ka miliyoni 35 Frw, ni mu gihe imiryango yari ifite imitungo iri munsi y’ayo mafaranga yo yagenewe inzu mu Mudugudu w’Icyitegerezo wa Busanza uherereye mu Murenge wa Kanombe ho mu Karere ka Kicukiro.

Nk’uko bitangazwa n’Umuvugizi wungirije wa Guverinoma, Alain Mukurarinda, imiryango 45 ni yo imaze guhabwa ariya mafaranga, akaba ari mu gihe imiryango 53 ari iyo igombwa kubona amafaranga nk’ingurane.

Imiryango umunani itarahabwa ingurane byatewe n’ibibazo bitandukanye bitarakemuka, birimo ko hari abari bararegeye inkiko bagitegereje icyo izo nkiko zizanzura, nk’uko Mukuralinda yabwiye Igihe.com.

Muri Nzeri uyu mwaka nibwo hatangiye igikorwa cyo kwimura mu buryo bwa rusange, abari batuye Midugudu ya Kangondo na Kibiraro, kwimura abo baturage biri mu murongo Guverinoma yihaye wo kubatuza neza bavanwa ahashyira ubuzima bwabo mu kaga.

Imiryango 1,130 igizwe n’abantu 5,402 niyo kugeza magingo aya imaze kwimurirwa mu mudugudu wa Busanza. Buri muryango mu yimuriwe mu Busanza wahawe inzu ifite agaciro kari hagati ya miliyoni 14Frw na miliyoni 35Frw.

Ibyo byakozwe ku baturage bose n’abari bafite imitungo ifite agaciro kari munsi ya miliyoni 14 Frw.

Kuba Leta itanga amafaranga angana kuriya ngo irengere umuturage ni ikimenyetso cyerekana yitaye ku muturage wayo ndetse inamwumva;  bitandukanye n’induru nyinshi abanzi b’u Rwanda bavugije barwanya iyi gahunda ariko ntibigire icyo bitanga.

Gahunda yo kwimura abaturage ba Kangondo na Kibiraro Leta yayikoranye ubushishozi n’ubunyamwuga; ibintu bishimangirwa na benshi mu baturage ubu batuye muri uriya mudukugudu w’icyitegerezo ariko bari barabanje kwinangira mu kwimuka kubera ibihuha bahabwaga n’abarwanyaga iyi gahunda.

Kugeza magingo aya abatujwe mu Busanza bameze neza, gusa igitangaje ni uko interahamwe n’ibigarasha bagiye bakoresha bamwe mu bamotsi babo bagumure aba baturage nta numwe urabasura ngo nibura yiyumvire uburyo ubu babayeho.

Mugenzi Félix

Leave a Reply

%d bloggers like this: