February 4, 2023

Interahamwe zigeze aho kwifashisha baringa mu gushimangira indi baringa ya ‘jenoside’!

Hashize iminsi interahamwe zatorokeye ubutabera ku Migabane ya Amerika n’Uburayi zikajije umurego mu gupfobya Jenoside yakorewe Abatutsi ziyobya uburari mu kinyoma kivuga ko mu Rwanda habaye jenoside ebyiri.

Ibyo bifasha interahamwe mu mugambi mubisha wazo wo guha ishingiro Jenoside yakorewe Abatutsi nk’uko byagiye bigaragara kenshi aho usanga ziregura zivuga ko zishe Abatutsi kubera zitabaraga.

Ni ibintu bitandukanye cyane n’uko zajyaga kwica zivuga ngo “abatutsi bishe umubyeyi” wazo. Uwo ‘mubyeyi’ ni umunyagitugu Habyarimana Juvenal wiyitaga Kinani, uyu kimwe n’abandi bahezanguni barizwaga mu “Kazu” akaba ari bo bacuze umugambi wa Jenoside kuva kera.

Hari ibimenyetso bigaragaza ko iyo “jenocide” yindi interahamwe zivuga ari umushinga muremure wari warateguwe na Col Bagosora wo guhakana ibyo bari basize bakoze ahubwo bakabigereka ku ngabo za RPA.

Kimwe muri ibyo bimenyetso ni uko usanga bavuga imibare gusa aho nta na hamwe bajya bagaragaza amazina y’abaguye muri iyo ngirwa-jenoside cyangwa ngo bagaragaze uko yateguwe n’uko yahagaritswe cyangwa uwayihagaritse.

Ibi bitandukanye cyane n’uko abazize Jenoside yakorewe Abatutsi bose bazwi kandi n’abatangabuhamya bakaba ari benshi bagaragara mu gihe ku ruhande rw’interahamwe ho usanga ari bantu bamwe bamenyerewe cyane ku mbuga nkoranyambaga.

Muri abo bantu twavuga abibumbiye mu ngirwa-shyaka FDU-Inkingi ibarizwa mu kwaha kw’Umutwe w’iterabwoba wa FDLR, harimo n’abahunze inkiko gacaca kubera uruhare bagize muri Jenoside yakorewe Abatutsi.

Twavuga nka Chaste Gahunde na Placide Kayumba hakiyongeraho na Claude Gatebuke uyu we ubeshya ahantu hose ko yarokotse jenoside yakorewe abatutsi kandi mu by’ukuri umuryango we wose warayigizemo uruhare rukomeye.

Usibye ako gatsiko maze kuvuga haruguru, umuryango mpuzamahanga ntiwigeze wemeza icyo aba banzi b’u Rwanda bita jenoside cyane ko uzi neza ukuri aho by’umwihariko utahwemye gusaba imbabazi mu buryo wagenze biguru ntege mu guhagarika Jenoside yakorewe Abatutsi.

Ku rundi ruhande, kuva na kera interahamwe zari zaramenyerejwe ko icyo umuzungu avuze cyose aba ari ukuri, ni muri urwo rwego zifashisha bamwe mu bacancuro b’abazungu ngo bazitize umurindi mu kinyoma cyazo aha ku ikubitiro haza uwitwa Judi Rever nawe wunga mu manjwe yabo ariko adatanga ikimenyetso na kimwe.

Kugaragaza imibare y’abantu utavuga imiryango yabo n’amazina ni ikimenyetso ntakuka cy’uko abo bantu ari za baringa zifashishwa kugira ngo bayobye banifatire imitima yoroshye y’abazungu dore ko iy’abanyarwanda yo batayibasha kuko biboneye n’amaso yabo ibyababayeho ari nayo mpamvu iki kinyoma bagitera utwatsi kikavugwa n’abantu bamwe gusa bishakira amaramuko.

Jenoside yakorewe Abatutsi ifite amateka n’ibimenyetso bigaragaza ukuntu yateguwe kera uhereye mu kubiba urwango mu banyarwanda babasumbanisha mu bikorwa bigenerwa abanyagihugu kugeza aho batatinye na gato kuzana imvugo zerekana ko abatutsi atari abantu nk’abandi ko ahubwo “bagomba kwicwa”.

Aha twavuga nk’indirimbo yakoreshwaga cyane n’urubyiruko rw’interahamwe n’impuzamugambi yagiraga iyi “Iyee tubatsembatsembe” itandukanye kure n’iyo umuryango RPF-Inkotanyi yaririmbaga igira iti “FPR umuryango w’abanyarwanda”.

Amaboko y’abanyarwanda nakomeze akorere u Rwanda igihugu gikomeze kibe paradizo. Twime amatwi kandi tunamagane abapfobya jenoside yakorewe abatutsi.

Umutesi Grace

Ibikubiye muri iyi nyandiko ni ibitekerezo bwite by’umwanditsi. Umutesi Grace ni umubyeyi akaba na Rwiyemezamirimo uterwa ishema no kuba yarasubijwe agaciro mu gihugu abamukomokaho bari barakavukijwe.

Leave a Reply

%d bloggers like this: