December 7, 2022

Ushobora kwishima nubwo waba ufite ibibazo – Perezida Kagame avuga ku byishimo mu Banyarwanda

Perezida Paul Kagame yatangaje ko abantu bakwiriye kumva ko bahorana ibyishimo mu buzima bwabo bwa buri munsi no mu gihe baba bafite ibibazo, kuko ibyishimo ari ikiraro kiganisha ku bisubizo mu gihe cy’ibibazo.

Umukuru w’Igihugu  yavuze ibyo kuri uyu wa 13 Ukwakira 2022 asubiza ikibazo yari abajijwe n’umusore wo muri Norvège w’imyaka 24 wari witabiriye itangizwa rya YouthConnekt, ku ibanga ry’u Rwanda rituma ahantu hose umuntu agera, asanga abahatuye bishimye.

Uyu musore yavuze ko muri Afurika ariho hantu honyine ku Isi hari abantu bishimye, atanga urugero ku rugendo aherutse kugirira mu Ntara y’Iburengerazuba agasanga abaturage baho b’abahinzi, babayeho mu buzima bishimiye, nk’uko inkuru idukesha IGIHE ibigaragaza.

Umukuru w’Igihugu yavuze ko kwishima ari amahitamo umuntu agira, aturuka ku kumva neza ubuzima abayemo n’icyo ashaka kugeraho.

Ati “Ibyishimo biva mu gushaka kwishima no kumva neza ubuzima ubayemo. Niba uri gukora ibintu bikubashisha kwishima, urishima, ntabwo wishima ari uko udafite ibibazo.”

“Ushobora no kwishima ufite ibibazo, ahubwo bitewe n’uko wumva ibibazo byawe, ukabishyira aho bigomba kujya, ugashaka ibisubizo. Hagati aho, kwishima ni ikiraro kiganisha ku bisubizo mu gihe cy’ibibazo.”

Gahunda ya “Youth Connekt’’ yatangiye mu 2012 ku gitekerezo cya Perezida w’u Rwanda, kugeza ubu ibihugu 23 byamaze kwemeza iyi nama ndetse biyitabira mu buryo buhoraho.

By’umwihariko imirimo y’iyi nama iri kubera mu Rwanda izasozwa kuri uyu wa 15 Ukwakira 2022.

Ubwanditsi

Leave a Reply

%d bloggers like this: